Jens Stoltenberg leggur frá sær í dag

Reyð-grøna stjórnin í Noregi leggur frá sær dag, eftir at hon hevur lagt sítt seinasta fíggjarlógaruppskot fyri Stórtingið.

Tá Jens Stoltenberg, forsætisráðharri, hevur verið hjá Haraldi kongi og boðað frá, at stjórnin leggur frá sær, fer kongur væntandi at heita á stjórnina um at vera starvsstjórn til mikudagin, tá Høgra-leiðarin, Erna Solberg, fer at kunngera nýggju stjórnina.

18 ráðharrar

Sambært norskum miðlum, hava Høgriflokkurin og Framburðsflokkurin avtalað, at 18 ráðharrar skulu manna nýggju, borgarligu stjórnina. Høgri fær 11 ráðharrasessir og Framburðsflokkurin sjey.

Forkvinnan í Framburðsflokkurin, Siv Jensen, verður fíggjarmálaráðharri, og Børge Brende, sum í løtuni er stjóri í World Econmic Forum, verður uttanríkisráðhari.

Kaldlig viðurskifti við Kina

Norska tíðindastovan, NTB, skrivar, at Erna Solberg vónar, at Børge Brende kann bøta um viðurskiftini við Kina, sum hava verið sera kaldlig, síðani kinesiski andstøðingurin, Liu Xiaobo, fekk Nobel friðarheiðurslønina í 2010.

Eygleiðarar vísa á, at Børge Brende í starvi sínum sum stjóri í World Econmic Forum hevur havt beinleiðis samband við kinesiska forsætisráðharran.