Trý mótmælisfólk deyð í Kiev

Keldur hjá mótmælisfólkunum í høvuðsstaðinum í Ukreina, Kiev, siga, at trý mótmælisfólk eru deyð í bardøgum í miðbýnum í Kiev í dag.

Bardagar í miðbýnum í ukreinska høvuðsstaðnum, Kiev, hava í dag kravt trý mannalív, og 150 fólk eru løstað.

Grækaris Djurhuus Magnussen

18.02.2014 - 14:47

Tað eru millum annað AFP og Sky News, sum bera tíðindini um hørðu bardagarnar í Kiev í dag. Tey hava tíðindini frá heilsustarvsfólkum hjá mótmælisfólkunum.

Ein limur í ukrainska tinginum sigur á Facebook, sambært norska blaðnum VG, at trý lík liggja í einum húsum tætt við tjóðartingið í miðbýnum.

Løgregla og mótmælisfólk løstað

Ukreinska innanríkisráðið sigur í dag, at 37 løgreglufólk hava fingið skaða í samanbrestunum.

Fyrr í dag lupu stuðlar hjá andstøðuni á høvuðssætið hjá Viktor Janukovitsj, forseta, við bensinbumbum - sonevndum molovtovkokteylum. Fleiri hundrað fólk vóru við í álopunum, har rútar vórðu knústir.

Sambært AFP eru 150 mótmælisfólk løstað í samanbrestum við løgregluna. Eini 30 fólk hava fingið skaðar í høvdið. Ein av andstøðuleiðarunum, Vitalij Klitsjko, heitir á Janokovitsj at taka løgregluna aftur úr gøtunum.