58 prosent reallønarvøkstur í Noregi

Norska Kringvarpið hevur gjørt upp, hvussu nógv lønin hjá norðmonnum er hækkað seinastu árini, tí í dag byrja lønarsamraðingarnar í Noreg.

Norski granskarin, Ådne Cappelen sigur við NRK, at í Noreg kann man tosa um tey 19 vánaligu og 18 tey góðu árini, tá talan er um virksemi. 70ini og 80ini vóru ikki serliga góð, tí hóast lønin ikki hækkaði serliga nógv, so var neyðugt við lønar- og príssteðgi í 1979, fyri at løn og virksemi skuldu samsvara.

Gekk framá

Síðani í 1995 hevur bara gingið framá, og tað hevur havt við sær, at lønirnar eru nógv hækkaðar. Norski granskarin vísir á, at lønirnar eru nógv hægri í Noreg, enn í londunum sum Noreg samstarvar við, og tí er ilt at meta um, hvussu úrslitið av samráðingunum verður. Tí tað gongur væl í Noregi, arbeiðsloysið er lágt, yvirskot er á fíggjarlógini og í samhandlinum við onnur lond.

Tað einasta, sum kann vera ein trupulleiki, er, at Noreg má laga seg til broyttar umstøður, um oljuprísurin fellur, sigur Ådne Cappelen, granskari við NRK.