Noreg vil hava samráðingar um svartkjaftin

<p>Norska fiskimálaráðið hevur sent út tíðindaskriv, har víst verður á, at Noreg ætlaði at halda fram við samráðingunum um svartkjaft og sild.</p>

<p>Men hvørja ferð hevur ES útsett samráðingarnar, hóast bæði Rusland, Ísland og Føroyar vildu halda fram við teimum samráðingunum, skrivar Fiskaren.</p>

<p>Samráðingarnar um bæði svartkjaft og sild snúgva seg um, at sleppa at fiska í øki hjá hvørjum øðrum. Fyri norsku skipini hevur tað stóran týdning, at norsku skipini sleppa at fiska svartkjaft í ES-sjógvi og í føroyskum sjógvi.</p>

<p><strong>Kemur illa við hjá norskum svartkjaftaskipum</strong></p>

<p>Tá talan er um sild, skulu hini londini sleppa í norskan sjógv at fiska.</p>

<p>Norska fiskimálaráðið sigur, at tað kemur illa við hjá norsku svartkjaftaskipunum, um tey ikki sleppa at fiska í ES-sjógvi og í føroyskum sjógvi, tí tað verður torført at fiska svartkjaftakvotuna í altjóða sjógvi.</p>

<p>Norska fiskimálaráðið ger greitt, at fæst ikki semja um, hvussu svartkjafturin skal fiskast, heilt skjótt, so má avtalan um fiskiskapin eftir sild broytast tilsvarandi.</p>

<p><strong>Samráðingar aftur í næstu viku</strong></p>

<p>Jacob Vestergaard, landsstýrismaður, sigur seg rokna við, at samráðingarnar um sildina og svartkjaftin byrja aftur í næstu viku.</p>

<p>Føroysk skip hava loyvi at fiska ein part av makrelinum í norskum øki og í ES-øki, og svartkjaft í ES-sjógvi.</p>

<p>Avtalan um sild hevur ikki so stóran týdning, tí føroysku skipini hava fiskað sild í føroyskum sjógvi, og tað hevur borið væl til.</p>

<p>Føroyar hava ikki góðtikið býtið av sildini, sum hevur verið. Tí er ikki vist, at Føroyar skriva undir nakra avtalu um sildina í ár, sigur Jacob Vestergaard.</p>