Fleiri spurningar um Anitu

Gunnvør Balle, løgtingskvinna fyri Tjóðveldi, hevur sett landsstýrismonnunum Johan Dahl, Jacobi Vestergaard og Jørgeni Niclasen fyrispurningar um garnaskipið Anitu.

Gunvør Balle spyr Johan Dahl, hví Sjóvinnustýrið ikki gav Anitu siglingarbann eftir vanlukkuna, tá ein av manningini fór fyri borð og ikki spurdist aftur, hóast lógin um trygd á sjónum heimilar Sjóvinnustýrinum at gera tað.

Hon spyr eisini Johan Dahl, um Sjóvinnustýrið ikki hevur skyldu til at fremja eftirlit við, at skip undir føroyskum flaggi í føroyskum sjógvi lúka krøv um trygd umborð.

Johan Dahl verður eisini biðin um at svara, um hann heldur, at trygdin umborð á Anitu var í lagi.

Gunvør Balle spyr Jacob Vestergaard, um Anita hevði undantaksloyvi at lata gørnini standa longur enn teir 72 tímarnar, sum sambært lógini er tað longsta, tey kunnu standa, og um tað fær nakrar avleiðingar fyri avvarðandi myndugleika ella reiðaríið, at gørnini hava staðið so leingi.

Jørgen Niclasen verður m.a. spurdur, hvør tekur sær av lønarviðurskiftunum hjá manningini á Anitu, og um nakar eftirlitsmyndugleiki kann tryggja, at manningin fær sína hýru.

Allir tríggir spurningarnir eru settir eftir grein 52 í tingskipanini, og teir skulu svarast skrivliga.