Barsilsskipanin: Fyrningarfreistin skal haldast

<p>Fólk, ið halda seg hava fingið ov lítið frá Barsilsskipanini í tíðarskeiðnum frá 6. desember í 2008 til 6. desember í fjør, eiga at gera vart við seg. Grundarlag er ikki fyri at seta úr gildi vanligu fyrningarfreistina, sum er fimm ár.</p>

<p>Barsilsskipanin hevur fyrisitið eftir bestu sannføring. Kærunevndin sigur ikki, at mannagongdin hjá Barsilsskipanini var skeiv.</p>

<p>Men ivi um, hvussu ein lóg skal tulkast, eigur at koma teimum, sum kærdu, til góðar. Tað sigur Vinnumálaráðið í einum uppriti, nú Kærunevndin&nbsp;hjá Barsilsskipanini hevur avgjørt, at fólk, sum vóru í barsilsfarloyvi styttri enn ein mánað, fingu ov lítið frá skipanini.</p>

<p>Vinnumálaráðið sigur, at avgerðin hjá Kærunevndini hjá Barsilskipanini er tikin til eftirtektar.</p>

<p><strong>Vinnumálaráðið bað Løgtingið um lógarbroyting</strong></p>

<p>Barsilsskipanin skal av sínum eintingum taka mál í tíðarskeiðnum 6. desember í fjør, tá Kærunevndin tók sína avgerð, til og við 23. mai í ár, tá lógin varð broytt, upp til nýggja viðgerð og gjalda munin millum tað, sum fólk fingu, og tað, sum tey áttu at fáa í barsilspengum.</p>

<p>Fyrningarfreistin er tann vanliga, fimm ár, so Barsilsskipanin skal fara aftur til 6. desember í 2008 og viðgera mál av nýggjum, men bara, um fólk biðja um tað.</p>

<p>Tá Vinnumálaráðið frætti um avgerðina hjá Kærunevndini, bað tað løgtingið broyta lógina, so eingin ivi eigur at vera um, at lógin skal tulkast soleiðis, sum Barsilsskipanin gjørdi. Sum Vinnumálaráðið sigur í sínum uppriti: praksis hjá Barsilsskipanini er legaliserað.</p>