Vágatunnilin skuldarfríur um hálvt triðja ár

Partafelagið Vágatunnilin verður skuldarfrítt um hálvt triðja ár, eitt ár fyrr enn ætlað.  Men felagið noyðist at fara aftur til lángevaran eftir pengum, sum eru goldnir ov tíðliga, so nýggjar íløgur og viðlíkahald kunnu gerast.  

Sambært láns-avtaluni hjá felagnum skal seinasti avdráttur gjaldast 12.desember í 2017.Men tað verður gjørt longu í desember í 2016, hevur Fíggjarmálaráðið fingið at vita.

Gott gjaldføri

Vágatunnilin hevur seinastu árini havt gott gjaldføri. Fyri at fáa sum mest í rentu fyri gjaldførið, hevur felagið sett tað inn á lánið og soleiðis spart nógva rentu av láninum frá Íleggingar-grunninum. Hetta ger, at stóra lánið verður útgoldið nú í juni í ár. Men felagið hevur eisini stuttfreistaða skuld, sum er 11,4 mió. kr.

Við árslok 2016 verður Partafelagið Vágatunnilin skuldarfrítt. Men tá er kortini ikki leyst og liðugt. Orsøkin til góða gjaldførið er, at felagið hevur útsett ætlað viðlíkahald og íløgur so sum at asfaltera, skifta ljós og endurnýggja pumpur. Tí noyðist felagið at taka út aftur av láninum til at gjalda tað, sum felagið annars ikki hevur tøkt gjaldføri til, tí tað er farið til at gjalda lánið við. 

Biðið um frágreiðing

Í lánsavtaluni við Íleggingargrunnin er møguleiki fyri at taka tað útaftur, sum er goldið ov tíðliga í mun til lánsavtaluna. 

Landsstýrismaðurin í fíggjarmálum, Jørgen Niclasen, hevur biðið P/f Vágatunnilin um eina ítøkiliga frágreiðing um nýggjar íløgur og viðlíkahald í Vágatunlinum.