Golfvøllurin: Mugu semjast um endurgjaldið fyrst

Búnaðarstovan fær ikki avgreitt lendið á Gluvurnesi, sum Tórshavnar kommuna skal leiga til golfvøll, fyrr enn kommunan og landsstýrið eru samd um endurgjaldið.

Í øllum førum skal endurgjaldið vera greitt, áðrenn lendið verður tikið frá festaranum. Og Búnaðarstovan hevur eingi boð fingið um endurgjaldið.

Sambært lógini um landsjørð kann Búnaðarstovan taka aftur nýtslurætt frá festara til lendi og leiga kommunu lendið til almannagagnligt endamál.

Skulu rinda endurgjald

Men kommunan skal rinda endurgjald fyri millum annað vetrarbit og annan fíggjarligan miss hjá festaranum. Og Tórshavnar kommuna vil hava landið at vera við í endurgjaldinum.  

Landsstýrið er, sum skilst, sinnað at vera við, men spurningurin er ikki avgreiddur enn.

Skulu Føroyar fáa Oyggjaleikirnar í 2019, er brúk fyri einum golfvølli, tí sum er kunnu Føroyar bara bjóða 11 ítróttargreinar, men kravið er 12 greinar. Leygardagin verður avgjørt á aðalfundi hjá Oyggjaleikasambandinum, um Føroyar fáa leikirnar í 2019.