Julian Assange verður møguliga frælsur maður í dag

Verður eftirlýsingin strikað, verður 43 ára gamli Assange frælsur maður aftur. Hann hevur síðani 2010 verið eftirlýstur í Svøríki fyri neyðtøku og kynsligan ágang móti tveimum kvinnum. Assange noktar seg sekan.

Hægsti dómstólur í Bretlandi gjørdi í mai 2012 av, at Assange skuldi útflýggjast Svøríki, og tá søkti hann sær skjól á sendistovuni hjá Ekvador í London, og hevur hildið til har síðani. Rættarfundurin byrjar klokkan 12 okkara tíð.

Verða boðini um handtøku strikað, verður eftirlýsingin eftir Assange í Interpol eisini strikað, og sostatt kann hann fara av sendistovuni uttan at stúra fyri, um bretsk løgregla bíðar honum.

Dýrur drongur

Assange hevur kostað bretskum myndugleikum dýrt. 56 miljónir krónur er brúktar til varðhald uttanfyri sendistovuna allan sólarringin.

Julian Assange hevur millum annað likið loynilig skjøl frá krígnum í Irak og Afganistan.

Skjølini vórðu løgd út á heimasíðuna wikileaks.com.