781-túsund atkvøddu fyri SvøríkiDemokratunum

Einasti flokkur í Svøríki, sum er ímóti tilflytarum, SvøríkiDemokratarnir (SD), fekk dygga undirtøku á valinum til Ríkisdagin í gjár. Og stuðulin kemur frá fyrrverandi veljarum hjá Moderaterna, vísur ein veljarakanning, sum SVT gjørdi í gjár.

Øll, sum vórðu spurd í kanningini, skuldu, umframt flokk, eisini biðin um at seta kross fyri kyn, aldur og starv. Og tey, sum ikki vildu svara hesum spurningum, eru ikki við í talgrundarlagnum.

Tíggju prosent av teimum, sum svaraðu, eru menn, sum atkvøddu fyri SD. Tað er tvífalding, samanborið við 5 prosentini, sum flokkurin fekk á seinasta vali. Til samanberingar atkvøddu seks prosent av kvinnunum fyri SD.

Frá Moderaterna til SD

SD stjelur serliga veljarar frá Moderaterna. 

29 prosent av SD-veljarunum atkvøddu fyri flokkinum hjá Fredrik Reinfeldt fyri fýra árum síðani. 

Serliga eru tað veljarar, sum áður eru farnir frá Sosialdemokratunum til Moderaterna, sum nú einini venda teimum baki og atkvøða fyri SD.

Røkkur fleiri veljarabólkum

SD røkkur nú út til fleiri veljarabólkar, enn undanfarin val. 

- Í høvuðsheitinum fær flokkurin veljarar frá somu bólkum, sum áður, men ein útjavning fer fram, - serliga viðvíkjandi aldri. Fyrr hevur SD hava unga veljarafjøld, men nú síggja vit ikki stóran mun viðvíkjandi aldri. SD stendur líka sterkur í aldursbólkum, greiddi valgreinarin, Henrik Ekengren Oscarsson, frá í svenska ríkissjónvarpinum ígjárkvøldið.

Fyri fýra árum síðani vóru trý prosent av veljarunum hjá SD eldri enn 65 ár. Men nú er talið vaksið, - nú atkvøða átta prosent av veljarum, sum eru eldri enn 65, fyri SD.