Tilsamans 3.171 hava latið lív í krígnum í Ukraina

Kríggið millum ukrainska herin og ukrainar, sum vilja leggja landið undir Russland, brast á í apríl.

263.000 fólk eru flýdd undan krígnum í landspørtunum Donetsk og Lugansk.

Haraftrat eru 367.000 fólk flýdd til grannalondini, tey flestu eru farin til Russlands.

Vápnahvíldin brotin

5. september lýstu partarnir vápnahvíld, men um vikuskiftið doyðu seks sivilfólk, tá ein rakett rakti eitt sølutrog í Donetsk, har tey russiskt sinnaðu hava havt valdið í fleiri mánaðir.

Hóast ófriðurin er kyknaður aftur, tekur Petro Porosjenko, forseti í Ukraina, uppaftur, at tey russiskt sinnaðu har eysturi í landinum skulu fáa avmarkað sjálvstýri í trý ár.

Uppskotið verður væntandi samtykt í ukrainska tinginum í dag.