Aling dálkar fjørðin men óvissa er um hummara

Tað er greitt, at undir aliringum kann vera illa dálkað, og dálkingin kann hava stóra ávirkan á botndjór. 

Hin vegin veit Umhvørvisstovan ikki, hvussu aling ávirkar hummara í einum fjørði. 

Umhvørvisstovan sigur í hoyringarskrivi til aliumsitingina á Heilsufrøðilgu Starvsstovuni, at hon hevur ikki enn fingið úrslit frá botnkanningum á broytta og víðkaða aliøkinum á Árnafirði, nú P/f Bakkafrost Farming hevur søkt um at endurnýggja aliloyvið á Árnafirði. 

Umhvørvisstovan metir tað vera skilagott at flyta alingina longri út á fjørðin, har sjógvútskiftið er størri. 

Orsøkin er, at aliøkið innari á fjørðinum áður hevur víst seg at vera dálkað av alingini. 

Mælir til at strika

Umhvørvisstovan hevur samstundis mælt til, at aliøkið innari á fjørðinum verður strikað, um alingin verður flutt longri út. 

Umhvørvisstovan hevur áður víst á tað óhepna í, at allir firðir og sund verða lagdir út til aling. 

Umhvørvisstovan hevur mælt til, at umfatandi metingar verða gjørdar av møguligari ávirkan frá alingini á umhvørvi og vistskipanir.

Umhvørvisstovan sigur seg ikki vita, hvussu dálkingarstøðan á nýggju staðsetingini á Árnafirði er. Tí er ilt at meta um, hvørt økið er væl egnað til aling, stendur í hoyringarskrivinum.