Grótharðar samráðingar um makrel ikki fyri børn

Grønland ætlar sær meira en 100.000 tons av makreli næsta ár.

Samráðingarnar um makrel vera grótharðar, tær vera ikki fyri børn, sum aðalstjórin í grønlendska fiskimálaráðnum, Jørgen Isak Olsen, tekur til í samrøðu við danska blaðið Politiken.

Sagt verður tó ikki, hvønn Grønland skal samráðast við um markrel. 

Ikki viðurkent

Hini strandarlondini viðurkenna ikki Grønland sum strandarland. Grønland er tí ikki við, tá strandarlondini býta - ella royna at býta makrelin millum sín.

Í ár gav Grønland sær sjálvum 100.000 tons av makreli. Knappliga 80.000 tons eru fiskað.

Jørgen Isak Olsen sigur, at makrelurin skal bjarga grønlendska búskapinum.

Hann sigur, at 13 prosent av makrelstovninum eru í grønlendskum sjógvi.