Óvist hví skúlanæmingur skeyt floksfelagar

Skúlanæmingurin, ið var væl umtóktur, skeyt og drap ein floksfelaga og løstaði fýra aðrar áðrenn hann gjørdi enda á sær sjálvum í mathøllini í Marysville-Pilchuck High School í vestara statinum Washington fríggjadagin.

Løgreglan hevur funnið skotvápnið, og eini 100 vitni skulu avhoyrast. Familjulimir siga við Reuters, at gerningsmaðurin er 14 ára gamli Jaylen Fryberg, og at tvey av teimum løstaðu eru hansara systkinabørn, skriva tíðindastovurnar, Ritzau og Reuters.

Floksfelagar og foreldur hava tosað um fleiri orsøkir. Eitt nú verður nevnt, at ein genta, honum dámdi, heldur hevði størra tokka til systkinabarnið. Eisini var ein samanbrestur á einum fótbóltsvølli, tá skal gerningsmaðurin hava brotið nøsina á einum øðrum næmingi.

Eitt triðja systkinabarn. Brandon Hatch, hevur lýst tey trý sum bestu vinfólk, ið búði nærhendis hvørjum øðrum. Facebook-vangamyndin ber boð um, at Fryberg var hugtikin av vápnum. Seinastu mánaðirnar hevur hann givið ilt frá sær á Twitter.