- Tíðindi, mentan og ítróttur
Nýtt lóggávuting í Ukraina veljast
![](https://kvf.fo/sites/default/files/styles/grein-ovasta-mynd/public/ukraina-val.jpg?itok=oYZgJK4A)
Veljarar í Ukraina fáa nú høvið at velja nýtt lóggávuting í landinum eftir at táverandi forsetin í landinum, Viktor Janukovitsj, varð rikin frá valdinum í februar í ár.
Eygleiðarar vænta, at teir ES-vinarligu flokkarnir fara at fáa flestu atkvøðurnar á valinum í dag. Flokkurin hjá sitandi forsetanum, Petro Porosjenko, er spáddur eitt gott val í dag.
36 milliónir fólk í Ukraina hava atkvøðurætt á valinum í dag, har 438 fólk skulu veljast í lóggávutingið. Umleið 13 prosent hava ikki atkvøðurætt orsakað av ósemjuni við Russland, skrivar AP.
700 eygleiðarar frá OSCE skulu tryggja, at valið í Ukraina í dag fer fram eftir galdandi lógum. Eygleiðararnir skulu eisini tryggja, at valsvik ikki verður framt, tá ukrainar seta sín kross í dag.
Samstundis sum fólk í Ukraina í dag skulu velja nýtt lóggávuting, verður eisini punktum sett fyri stýrinum hjá Viktor Janukovitsj og ófriðinum í kjalarvørrinum, tá hann varð rikin frá, har fleiri enn 3.000 fólk lótu lív.