Sakarmálið um Chr. í Grótinum útsett til næsta ár

Rættarfundurin, sum skuldi vera um nótaskipið Christian í Grótinum í Lerwick í Hetlandi í dag, er útsettur til eina ferð næsta ár, hevur reiðaríið í Klaksvík fingið at vita.

Christian í Grótinum var á veg til Føroya eftir ein túr í ES-sjógvi við Hetland, tá hann fekk boð frá skotska fiskiveiðieftirlitinum um at fara til Lerwick. Har lá skipið í tveir dagar, áðrenn tað slapp at halda leiðina fram til Føroya.

Skiparin á Christiani í Grótinum, Páll Klein Rasmussen, fekk at vita, at hann hevur brotið tvær ES-reglur um makrelfiskiskap. 

Onnur reglan er um kemiska viðgerð av fiskinum, og hin er um, at fiskurin ikki verður frystur so skjótt sum hann er skildur.

Christian í Grótinum hevur verið ein túr við Hetland eftir makreli, síðani hann varð tikin. Men tá høvdu teir bara feskt, og tá vóru eingir trupulleikar av skotsku myndugleikunum.