Nýtt samráðingarumfar í Minsk

Samráðingarnar fara fram í Minsk, sum er høvuðsstaður í Hvítarruslandi.

Tað er nú átta mánaðir síðan, at ófriðurin millum ukrainska herin og ukrainar, sum vilja leggja landið undir Russland, brast á. Síðan tá hava 4700 fólk latið lív í Ukraina.

Kreppan hevur elvt til, at viðurskiftini millum Russland og vesturheimin eru nú so køld sum sjáldan fyrr. ES hevur sett handilsforðingar fyri Russland, sum hevur skundað undir búskaparkreppuna, sum nú er har. 

Hóast fleiri áheitanir um at sleppa sær úr Ukraina, hevur russiski forsetin Vladimir Putin enn ikki tikið sínar hermenn heim.

Tjóðartingið í Ukraina samtykti í vikuni at søkja um limaskap í verjusamgonguni NATO. Forsetin, Petro Porosjenko, segði tá, at Ukraina søkir um limaskap, tí landið kennir seg hótt.