- Tíðindi, mentan og ítróttur
Team Klaksvík fær stigini
![](https://kvf.fo/sites/default/files/styles/grein-ovasta-mynd/public/141117_3_2_neistin_kyndil_menn_web_168_0.jpg?itok=L09gFM3y)
Tann 28.september í fjør spældu Kyndil og Team Klaksvík landskappingardyst.
Kyndil vann dystin, men nú er endaliga staðfest, at teir taptu allíkavæl.
Málið snýr seg um, at Kyndil í dystinum hevði Rune Olsen á vøllinum, hóast hann ikki var skrásettur.
Umsitingin í Hondbóltssambandinum kunnaði eftir dystin bæði Kyndil og Team Klaksvík um hetta, og síðani kærdi Team Klaksvík.
Aganevndin og Dómsnevndin hjá Hondbóltssambandinum góvu Team Klaksvík viðhald, og í dag staðfesti Ítróttardómstólurin, at spælarin var ólógligur eftir reglunum.
Kyndil: Hondbóltssambandið fylgir ikki røttu mannagongdum
Kyndil vísir í sínum svarið á, at Hondbóltssambandið skal ikki blanda seg upp í slík mál og eggja feløgum at kæra. Tað skulu feløgini sjálvi taka sær av.
Kyndil førdi fram móti Dómsnevndini, at kærumálið átti at verið kolldømt, og at upprunaliga úrslitið, 32-18 til Kyndil, átti at verið standandi.
Ítróttardómstólurin: Reglurnar leggja ikki í, hvar vitanin kemur frá
Ítróttardómstólurin staðfestir í dag, at reglurnar siga einki um, hvar eitt felag skal hava fingið sína vitan frá, tá kært verður.
Tí er málið nú avgreitt, og tað er endaliga staðfest, at Team Klaksvík fær bæði stigini.
Kyndil er í løtuni á øðrum plássi við 19 stigum, meðan Team Klaksvík er á sjeynda plássi við seks stigum.
Feløgini møtast aftur í landskappingini tann 7.mars í Klaksvík.