Uppfinnarin av lasarastráluni er deyður

Amerikanarin, Charles Townes, sum var við til at uppfinna lasarastráluna, er deyður, 99 ára gamal.

Charles Townes fekk í 1964 Nobelheiðurslønina í alisfrøði fyri uppfinnigina, sum førdi til frambrotið í sambandi við telesamskifti, stjørnufrøði og heilivág.

Hann fekk prísin saman við tveimum russiskum granskarum, Nicolaj G. Basov og Aleksandr M. Protsjorov.

Í dag verður lasari nýttur til millum annað at skera í stál, skurviðgerð í mannakroppum og til at fanga tey, sum koyra ov skjótt á vegum kring allan heim. 

Rein og háfrekvent ljósstrála

Charles Towns var føddur í South Carolina, og hevur áður greitt frá, at hugskotið við at skapa reina og há-frekventa ljósstrálu við stuttari bylgjulongd kom til hansara, tá hann sat á einum beinki í eini viðarlund í Washington í 1951.

Í 1954 gjørdi hann, saman við lesandi, eina skipan, sum tey nevndu "maser". Seinni fekk hann, saman við einum verbróðri, Arthur Schawlow, hugskotið til tað, sum í dag eitur lasari.

Tó skal sigast, at tað var vísundamaðurin, Theodore Maiman, sum í 1960 var fyrstur at vísa, hvussu ein lasari virkar. Tey báðir russararnir, sum Charles Towns fekk Nobelprísin saman við, mentu teirra egna "maser" sjálvir, uttan hjálp frá amerikanaranum.