CIP-kanningin verður liðug fyrra hálvár í ár

Tíðarætlanin hjá Hans Gammeltoft-Hansen, sum kannar CIP málið fyri løgtingtið, er framvegis tann sama, sum hann segði, hon var, í samrøðu við Útvarpið á nýggjárinum.

Hann miðar eftir at fáa kanningina lidna seint í fyrra hálvári 2015. 

Kanningin fer at kosta landskassanum nakrar milliónir krónur. Til nýggjárs hevði løgtingið fingið rokningar fyri hálva fjórðu millión krónur.

Løgtingið varð í november í fjør biðið um tvær milliónir og 850.000 kr. at brúka til kanningina í fjør. 

Okkurt um 2,6 mió. kr. vóru longu brúktar, áðrenn løgtingið játtaði pengarnar. 

Í fíggjarlógini fyri 2015 bað løgtingið um hálva aðru millión krónur til eftirlit, eitt nú kanningar. 

Men tað er alt ov lítið, bæði í fjør og í ár, sambært teimum rokningum, sum Løgtingsskrivstovan higartil hevur fingið.