Tryggingarlógin dagførast: Danskar og ES fyrimyndir

Tryggingareftirlitið og Vinnumálaráðið eru farin at dagføra tryggingarlógina.

Hon skal í høvuðsheitum vera í samsvari við nýggju donsku tryggingarlógina.

Eisini verður mett, hvørjar ES-fyriskipanir um tryggingar skulu setast í gildi í Føroyum. 

Og kannað verður, hvørjar kunngerðir mugu dagførast ella orðast av nýggjum.

Tað upplýsir Jacob Vestergaard, landsstýrismaður, í svari til Helga Abrahamsen, løgtingsmann.

Hann spurdi um kravdu eftirlønaruppsparingina hjá føroyingum.

Millum annað spurdi hann, um nakað krav er um íløgurnar hjá lívstryggingarfeløgum og eftirlønargrunnum. 

Hóskandi og gagnligur

Landsstýrismaðurin svarar, at sambært tryggingarlógini skal peningur, sum lívstryggingarfeløg ella eftirlønargrunnar hava ræði á, brúkast til íløgur á ein hóskandi og fyri kundan gagnligan hátt.

Tað er, at íløgurnar skulu geva kundunum mest møguligt avkast í mun til íløguváðan.

Tryggingareftirlitið ger í løtuni dagførda avkastkanning, sum verður liðug seinni í ár.

Í Danmark hava lívstryggingarfeløg og eftirlønargrunnar sjálvboðið ment eina skipan til eftirlønarkundar, sum gevur teimum eitt heildaryvirlit um týðandi upplýsingar. 

Jacob Vestergaard sigur, at hann fer at heita á Tryggingareftirlitið um at kanna, um brúk er fyri slíkari skipan í Føroyum.