Harður jarðskjálvti í Nepal

Higartil eru 450 fólk deyð í einum hørðum jarðskjálvta í Nepal í morgun. Mong hava fingið skaða og nógv hús og søguligir bygningar eru farnir í sor, verður sagt.

Jarðskjálvtin er máldur til 7,9 - og var á leiðini millum høvuðsstaðin Katmandu og býin Pokhara, sigur amerikanski jarðfrøðistovnurin.

Ristingarnar merktust í Pakistan, Bangladesh og í grannalandinum India.

Kunningarmála-ráðharrin í Nepal sigur, at skaðin er ógvusligur, og at landið hevur brúk fyri allari hjálp, ið onnur lond kunnu koma við.

Skriðulop á Mount Everest

Jarðskjálvtin hevur havt við sær skriðjulop á Mount Everest, og danski Carsten Lillelund Peterse, sum saman við nógvum øðrum fjallaklintrarum var staddur í tilhaldinum "Basecamp 2", sigur við DR, at har máttu tey renna fyri lívinum, so tey ikki komu at ligga undir einum omanlopi.

Carsten Lillelund Petersen sigur, at ein lækni á staðnum hevur hjálpt fólki, ið hava fingið beinbrot og skaðar í høvdið og danin sigur seg vera vísan í, at onnur, ið vóru á veg upp eftir Mount Everest, eisini hava fingið skaða.

Jarðskjálvtar eru ikki óvanligir í Nepal, men sagt verður at hetta er tann ringasti síðani 1934, tá høvuðsstaðurin Katmandu nærum varð lagdur í oyði.