ST gjørdi ov lítið við mál um kynsliga misnýtslu

Fronsku myndugleikarnir kanna nú eitt mál, har franskir hermenn skulu hava gjørt seg inn á smábørn í Miðafrikanska Lýðveldinum, tá teir vóru partur av eini deild hjá ST.

Fronsku hermenninir eru undir illgruna fyri at hava gjørt seg inn á børn, niður í 10 ára aldur.

Sendi loynilig skjøl

Málið gjørdist alment í gjár, tá bretska blaðið, The Guardian., skrivaði, at ein svenskur starvsmaður í ST var sendur til hús, tí hann hevði sent loynilig skjøl til fronsku myndugleikarnar.

Í skjølunum sæst, at fronsku hermenninir skulu hava gjørt seg inn á smábørn á eini miðstøð í høvuðstaðnum, Bangui í fjør.

Sviin, Anders Kompass, sum starvast á deildini fyri mannarættindi hjá ST, hevur latið fronsku myndugleikunum skjølini, hóast tey vóru loynilig.

ST gjørdi ov lítið við málið

Svenska stjórnin sigur, at Anders Kompass er nógv virdur í sínum starvi í ST, og tí er eingin orsøk til at seta spurnartekin við tað sum hann hevur gjørt.

The Guardian skrivar, at sviin sendi skjølini til fronsku stjórnina, tí hann helt ikki at ST gjørdi nóg nógv við málið.

Fekk fótin

Anders Kompass var sendur til hús í farnu viku, og hevur fingið boð um, at hann kann rokna við at verða sagdur úr starvi.

Men fleiri felagskapir kring heimin mótmæla, tí hann hevur ikki gjørt annað enn sína skyldu, siga teir.