Nú hækkar heilsutrygdargjaldið

Sambært uppskotinum hjá landsstýrinum um eykajáttanarlóg, sum júst er komið í løgtingið, hækkar fasta gjaldið til Heilsutrygd tíggju krónur um mánaðin frá 1.juni.

Hetta fer at geva Heilsutrygd hálva-triðju millión krónur meira í ár. 

Harafturat noyðist játtanin í fíggjarlógini til heilsutrygdarveitingar at hækka seks milliónir krónur.

Orsøkin er, at heilivágur og hjálparráð eru vorðin dýrari. Heilivágur gjørdist 14 prosent dýrari í fjør, og hann heldur fram at dýrka í ár, stendur í lógaruppskotinum. 

Útreiðslurnar til hjálparráð hækka eisini. Hjálparráð eru til dømis pennar, sum fólk við diabetis brúka, og astmamaskur, sum verða brúktar saman við astmaheilivági.