Heilsuhús í gamla realskúlanum

Heilsuhúsið í Havn verður í gamla realskúlanum, beint sunnan fyri Kommunuskúlan. Tað boðar Tórshavnar kommuna frá.

Heilsuhúsið verður tvørfakligi snúningsdepilin hjá øllum tænastum og tilboðum á eldraøkinum, sum kommunan yvirtók á nýggjárinum og hevur skipað í nýggja stovninum Heilsu- og umsorganartænastan. 

Starvsfólk eru sett

Meta av Fløtum er leiðari í Heilsuhúsinum, sum er ein av trimum eindum í Heilsu- og umsorganartænastuni.
Hinir báðir eindarleiðararnir eru Jóngerð Guttesen og Maiken Olsen. Saman eru tær tríggjar leiðslutoymið í Heilsu- og umsorganartænastuni. 
Leiðslutoymið fer at halda til í Heilsuhúsinum. 
Haraftrat fara okkurt um 20 starvsfólk at hava skrivstovu har.

Miðstøð fyri ymsar tænastur

Heilsuhúsið verður eisini miðstøð hjá heimatænastuni, sum fevnir um heimahjálparar, heimasjúkrarøktarfrøðingar, heilsurøktarar og fysioterapeutar og ergoterapeutar. 
Heilsuhúsið letur upp eftir summarfrítíðina.