Í varðhald fyri at geva vaktarmanni nevan frammaná

Ein 49 ára gamal maður varð í Føroya rætti í dag varðhaldsfongslaður í fýra vikur, skuldsettur fyri harðskap.

Hann er skuldsettur fyri at hava givið einum vaktarmanni í SMS nevan í andlitið.

Hetta var seinnapartin í gjár, tá maðurin varð biðin um at fara úr SMS, tí hann var drukkin. Men í staðin fyri at gera, sum vaktarmaðurin bað hann um, gav maðurin vaktarmanninum nevan. 

Politiið tók mannin seinni seinnapartin í gjár, tá hann hevði brotið ein rút í einum húsum.

Maðurin er ein kenningur hjá politinum, so politiið avgjørdi at biðja um grundlógaravhoyring í dag fyri at fáa mannin varðhaldsfongslaðan. Maðurin noktar seg sekan í harðskapi, men hann varð varðhaldsfongslaður í fýra vikur.

Órudd í hagan um

Í dag fekk politiið boð um órudd við Syðradalsskarð við Oyggjarvegin. Sambært politinum í Havn er líkt til, at onkur hevur ruddað ein kjallara ella eitt úthús, tí har liggja timbur, ein ár, boyur og ymiskt annað.

Tað er ólógligt at tveita burturkast soleiðis í náttúrina. Politiið kannar nú, um til ber at finna tann, sum hevur givið Syðradalsskarði og ikki Brennistøðini óruddið.