Marknagilsdepilin klárur 24. november næsta ár

Dagurin, hósdagurin 24. november 2016, stendur í tilmæli frá Landsverki til Mentamálaráðið. - Kringvarpið hevur fingið innlit í tilmælið.

Landsverk heldur, at tað ber til at byggja skjótari, um arbeitt verður longri dagar við fleiri fólkum og amboðum, so arbeiðið kann verða liðugt sum upprunaliga ætlað í august næsta ár.

Landsverk mælir kortini frá at gera tað, tí so er vandi fyri, sigur Ewald Kjølbro, stjóri í Landsverki, at arbeiðið ikki verður gjørt nóg væl. 

Fíggjarligu avleiðingarnar verða størri við einari loysn, sum verður skundað ígjøgnum, stendur í tilmælinum frá Landsverki.

Roknivilla hjá donskum ráðgeva gjørdi tað neyðugt at fara afturumaftur, og tí er byggingin seinkað fýra mánaðir.

Landsverk og fakeftirlitið varnaðust í november í fjør, at alt ruggaði ikki rætt. Nakrir betongveggir vóru ov smalir. 

Fyritøkan Cowi, sum er óheftur ráðgevi hjá byggiharranum, hevur boðað Landsverki frá, at nú eru bæði útrokningar og loysnirnar í lagi og trygt er at byggja víðari. 

Endalig átekning og góðkenning frá Cowi eru tó ikki komnar enn. Tær koma væntandi beint eftir summarfrítíðina, tá útrokningar hjá undirveitara eru komnar, sigur Landsverk í brævinum til Mentamálaráðið.
Samanumtikið mælir Landsverk til, at byggitíðin verður longd, so Marknagilsdepilin verður tikin í brúk í desember 2016.