Landsstýrismaðurin: Færri tíðaravmarkað lærarastørv

Tíðaravmarkaðu størvini skulu vera færri og tey føstu fleiri.

Tað sigur Bárður á Lakjuni, landsstýrismaður, við Skúlablaðið um lærarastørv í fólkaskúlanum.

Men, sigur hann, vit sleppa helst ongantíð undan tíðaravmarkaðum størvum.

Til næsta skúlaár er lýst eftir 156 lærarum, 104 í tíðaravmarkað starv og 52 í fast starv, sigur Lærarafelagið.

Skulu søkja á hvørjum ári

Lærarar í tíðaravmarkaðum starvi skulu hvørt ár søkja starv.

Eingin teirra kennir seg tryggan í at hava starv, tá nýtt skúlaár byrjar.

Í kanning hjá Námsvísindadeildini sæst, at árini 2023, 2024 og 2025 fingu 85 fólk læraraprógv. 

Bara 55 teirra eru lærarar í fólkaskúlanum. Og bara níggju hava fast starv.