USA møguliga bumbað Læknar Uttan Landamørk

Tað er møguliga amerikanskar bumbur, sum drupu starvsfólk hjá Læknum uttan Landamørk í afganska býnum Kunduz í nátt.

Tað sigur Nato, eftir at tað er komið fram, at í minsta lagi trý fólk frá altjóða neyðhjálparfelagsskapinum hava latið lív eftir eitt loftálop á eitt sjúkrahús.

30 fólk eru ikki funnin enn.

Nato váttar, at amerikansk herlið framdu eitt loftálop í Kunduz klokkan eitt korter til 3 í nátt. 

Tíðspunktið samsvarar við tað, sum Læknar uttan Landamørk boða frá í sínum tíðindaskrivi um álopið.

Felagsskapurin sigur, at sjúkrahúsið varð rakt fleiri ferðir.

Tá vóru 105 sjúklingar og fleiri enn 80 starvsfólk til staðar.

(mynd: AP)