Vænta minni yvirskot í ár

Nú, eftir at bankin selur tryggingarfelagið Vørð í Íslandi, er væntaða úrslitið millum 200 og 220 milliónir krónur. Tað var upp í 240 milliónir krónur.

Til 1. oktober í ár hevði BankNordik 157 mió. kr. í vinningi, sum eru 41 mió. kr. meira enn í fjør. Renturnar góvu 17 mió. kr. minni í ár, men tænastugjøldini góvu 29 milliónir meira, tær milliónirnar koma fyrst og fremst frá íløgurøkt og realkreditti.

Niðurskrivingar á útlánum vóru 47 milliónir krónur minni enn í fjør. Raksturin kostaði 14 mió. kr. meira í ár. Orsøkin er millum annað eykaútreiðslur til KT, kunningartøkni.

Fyrrverandi forstjórin fær 9,6 milliónir

Tann 30. september í ár vóru 39 færri starvsfólk enn 30. september í fjør. Nógvu fráfaringarsamsýningarnar til uppsøgd fólk kostaðu bankanum 25 mió. kr.

Sambært Finanswatch, sum hevur hugt í roknskapin hjá BankNordik, fekk Janus Petersen 9,6 milliónir krónur fyri at fara frá sum forstjóri.

Tryggingarvirksemið hjá Trygd gav tríggjar milliónir krónur minni til 1. oktober í ár enn í fjør, sambært roknskapinum.