Ísland tekur ímóti flóttafólkum

Flóttafólkini eru í legum í Libanon. Íslendska flóttafólkanevndin gav í heyst ST boð um, at Ísland var til reiðar at taka fleiri flóttafólk.

ST svaraði við upplýsingum um 63 flóttafólk úr Sýria, sum eru í Libanon. 55 teirra, 21 vaksin og 34 børn, yngri enn 16 ár, eru nú boðin til Íslands.

Taka fleiri flóttafólk eftir nýggjár

Millum tey vaksnu eru rørleggjari, verkfrøðingur, elektrikari, barrvørður og tolkur. Flóttafólkini verða býtt millum kommunurnar, sum vilja taka flóttafólk. Helvtin fer til Akureyrar, hini fara vil Kópavogs og Hafnarfjørðin.

Ísland fyrireikar seg væl at taka móti flóttafólki, millum annað fáa tey sálarfrøðiliga hjálp, tá tey eru komin til Íslands. Eftir nýggjár fer Ísland at taka fleiri flóttafólk. Tá sleppa serliga fólk, sum eru í vanda, til Íslands.

Í gjár hitti Poul Michelsen, landsstýrismaður í uttanríkis- og vinnumálum, Eygló Harðardóttir, vælferðarráðharra í Íslandi. Tey tosaðu um flóttafólkamál og umstøðurnar hjá londunum báðum at taka í móti flóttafólki.