Grikkaland heldur ikki lánsavtaluna

Boðini vóru greið frá fleiri evropiskum fíggjarmálaráðharrum, tá teir fóru á fund í evru bólkinum seinnapartin í gjár í Brússel í Belgia.

- Vit verða noydd at fullføra fyrsta deilmálið í avtaluni, og tað skal verða sum skjótast, segði formaðurin fyri evru bólkin, Jeroen Dijsselbloem, beint undan fundinum.

Grikkaland skal seta í verk 48 ítøkilig tiltøk sambært ætlanini fyri nýskipanir, skal grikska stjórnin fáa upphæddina, ið svarar til 15 milliardir danskar krónur. Peningur, sum eftir ætlan skuldið verið fluttur Grikkalandi í oktober.

Langt eftir á mál

Umleið ein triðingur av teimum 48 tiltøkunum, ið skulu setast í verk, eru ikki fullførd, sigur ein kelda við týsku tíðindastovuna, DPA.

- Tað er bara Grikkaland sjálvt, ið skal seta í verk hesi tiltøk, sum vit samdust um í august mánaði, segði týski fíggjarmálaráðharrin, Wolfgang Schäuble, undan fundinum.

Búskaparkommisserurin í ES, Pierre Moscovici, er tó framvegis bjartskygdur, hóast grikkar drála, og hann segði í gjár, at næstu dagarnar ber til at finnan semju um støðuna.