Spent støða ímillum Saudi Arabia og Iran

Viðurskiftini millum Saudi Arabia og Iran eru sera spent, eftir at stýrið í Saudi Arabia í gjár avrættaði shiamuslimska leiðaran Nimr al-Nimr, sum síðani 2011 hevur verið ein av leiðandi persónunum í shiamuslimsku mótstøðurørsluni móti stýrinum í tí sunni-muslimska Saudi Arabia.

Nimr al-Nimr var bara ein av 47 fólkum, sum stýrið í Saudi Arabia í gjár avrættaði - tey avrættaðu vóru løgd undir at vera yvirgangsfólk. 

Men Nimr al-Nimr var ein kendur leiðari, sum eitt nú hevði brúkt 10 ár av sínum lívi at lesa teologi í Iran, áðrenn hann flutti aftur til Saudi Arabia, har hann var virkin í mótstøðurørsluni móti landsins stýri.

Avrættingin elvdi beinanvegin til hvassar atfinningar úr Teheran. 

-Saudiarabiska stjórnin kemur at gjalda ein høgan prís fyri henda politikkin, segði ein talsmaður fyri stýrið í Teheran beint eftir avrættingina. 

Og í morgun halda hvøssu orðini úr iranska høvuðsstaðnum  fram. Saudiarabiska stýrið verður rakt av guddómmiligari hevnd, segði andaligi leiðarin í Iran, ayatollah Ali Khamenei, í iranskum sjónvarpi.

Eisini varð eldur settur á saudiarabisku sendistovuna í Teheran í nátt.

Í morgun roynir ST-aðalskrivarin Ban Ki-moon at slætta sjógv. Aðalskrivarin heitir á allar leiðarar í økinum at hava friðin í huga og ikki koyra bensin á bálið við útsøgnum um avrættingarnar.

Ban Ki-moon sigur seg samstundis vera skelkaðan av avrættingunum í Saudi Arabia í gjár.