Noyðast helst at rinda fólki pening aftur

Bilframleiðarin, Volkswagen, sum í fleiri umførum hevur svikað við tølum fyri dálking, noyðist væntandi at rinda fólki pening fyri svikið

Volkswagen, væntandi noyðist at rinda fólki aftur pening fyri fimta hvønn bil ella keypa nýggja bil til tey, sum er rakt av gøluni

Sigrún H. Brend

Bjarni Mohr

07.01.2016 - 16:43

Týska blaðið Süddeutsche skrivar, at týski bilframleiðarin, Volkswagen, væntandi noyðist at rinda fólki aftur pening fyri fimta hvønn bil ella keypa nýggja bil til tey, sum er rakt av gøluni.

Volkswagen hevur í fleiri umførum svikað við umhvørvistølunum. VW hevur sett útbúnað í bilarnar, so bilarnir vístu seg at vera umhvørvisvinarligari, enn bilarnir í veruleikanum vóru.

Hava játtað umfatandi svik

Í summum førum dálkaði bilar 40 ferðir meira enn eftirlit vístu. Í september avdúkaði amerikanski umhvørvisstovnurin, at VW hevði selt umleið 500.000 dieselbilar í USA við framkomnu svik útgerðini.

Seinni hevur stóri, týski bilframleiðarin, Volkswagen, játtað, at hann hevur svikað við útlátinum hjá 11 milliónum Volkswagen-bilum kring allan heimin.

Amerikonsku myndugleikarnir hava kravt, at Volkswagen keypir aftur gølubilarnar. Felagið er í samráðingum við USA, og hevur bjóðað seg til at keypa aftur 115.000 bilar.