Merkel: Vit taka munandi færri flóttafólk í ár

Angela Merkel sigur við Reuters tíðindastovuna, at tað er stórarbeiði at fáa flóttafólkini at falla til í Týsklandi, og tað krevur nógva orku.

Týskland tók í fjør ímóti meir enn einari millión flóttafólkum og tilflytarum annars. Tað er eitt prosent av samlaða fólkatalinum í Týsklandi.

Angela Merkel lovaði á landsfundinum hjá konservativa flokkinum í desember, at Týskland ikki fór at taka ímóti eins nógvum flóttafólkum í ár sum í fjør.

Ikki fallið í góða jørð hjá øllum

Merkel legði kortini aftrat, at Týskland framvagis má vera eitt land, sum virðir onnur. Innanhýsis í konservativa flokkinum er mótstøðan stór ímóti flóttafólkapolitikkinum hjá samveldiskanslaranum.

Millum annað fór fyrrverandi løgmálaráðharrin í Sachsen, Steffen Heitman úr flokkinum í desember, sum mótmæli ímóti flóttafólkapolitikkinum.

Ungdómsfelagið hjá flokkinum hevur kravt, at Merkel setur mark fyri, hvussu nógv flóttafólk kunnu koma til Týsklands, men tað hevur hon higartil sýtt fyri at gera.