Hóttir við at leypa á lond

Herurin í Norðurkorea skrivar í fráboðanini, at hann setur fyribyrgjandi kjarnorkuálop í verk í rættvísins navni móti grannalandi sínum og USA.

Hetta hendir bara fáa dagar eftir, at norðurkoreiski leiðarin, Kim Jong-un segði, at kjarnorkuvápnini, sum Norðurkorea eigur, eru klár at taka í nýtslu, nær tað skal vera.

Norðurkorea sigur, at hernaðarvenjingin hjá Suðurkorea og USA er ein fjald kjarnorkukrígsvenjing. Náðileysa kjarnorkuálopið fer greitt at vísa, hvør vil hava ágang og kríggj, sigur Norðurkorea í hvassorðaðu fráboðanini.

USA hevur fyrr sagt, at Norðurkorea hevur ikki tøknina til at leypa á USA, og at um so verður, so noyðist Norðurkorea at fáa hjálp uttanífrá.