Valevnini býttu statirnar millum sín

Fleiri undanval í stríðnum um at gerast amerikanska forsetavalevni vóru í nátt.

Hillary Clinton og Donald Trump vunnu greitt valið hjá ávíkavist demokratunum og republikanarunum í Arizona. 

Báðir sigrarnir eru týdningarmiklir og hjálpa báðum valevnunum at halda fast í oddasessinum í stríðnum at gerast floksvalevni.

Sanders og Cruz vunnu eisini

Demokraturin Bernie Sanders hevur tó onga orsøk at leggja skarvin yvir. Hann vann greitt í Utah og í Idaho.

Eisini republikanarin Ted Cruz hevur orsøk til at fegnast. Hann fekk meir enn helvtina av atkvøðunum hjá republikanarunum í Utah í gjár.