Halda fram hóast hollendskt »nei«

Tað sigur ukrainski forsetin, Petro Poroshenko, sum er á vitjan í Japan. Avtalan millum ES og Ukraina kom longu í gildi á nýggjárinum.

Fyri at avtalan skal hava løgfrøðiligt gildi, skulu øll 28 limalondini í ES góðkenna avtaluna. Mikudagin avgjørdu hollendsku veljararnir á fólkaatkvøðu, at Holland skal ikki skriva undir avtaluna.

- Undir øllum umstøðum verður hildið fram at seta avtaluna við ES í verk, eisini ein grundleggjandi og víðfevnda fríhandilsavtalu, sigur Poroshenko.

SÍ EISINI Hollendingar atkvøddu »nei«

Nógvir ukrainar halda, at teir hava uppiborið avtaluna við ES eftir kreppuna við Russland, sum hevði við sær, at russar tóku Krim-hálvoynna.

Hollendingar, sum eru fyri avtaluni siga, at eitt nei ber í sær, at russiski forsetin, Vladimir Putin, vinnur ein sigur. Fólkaatkvøðan í gjár var ikki bindandi.

Men Mark Rutte, forsætisráðharri, hevur sagt, at tað ber ikki til at látast sum einmi, tí ein meiriluti av teimum, sum vóru á vali, hava atkvøtt ímóti.