Lógaruppskot skal forða fyri at stuðulin minkar

Landsstýriskvinnan í mentamálum hevur lagt lógaruppskot fyri tingið, ið skal tryggja, at prístalið ikki skal minka lestrarstuðulin

Prístalið eigur ikki at sleppa at lækka lestrarstuðulin. Landsstýriskvinnan kom í gjár við einum lógaruppskoti, sum forðar fyri, at lestrarstuðulin verður prístalsviðgjørdur í august

Høgni Djurhuus

Bjarni Mohr

13.04.2016 - 08:01

Prístalið eigur ikki at sleppa at lækka lestrarstuðulin. Tí kom landsstýriskvinnan í mentamálum í gjár við einum lógaruppskoti, sum forðar fyri, at lestrarstuðulin verður prístalsviðgjørdur í august. Tað er stuðulin frá Studna fyri lestrarárið 2016-17.

Bleiv lestrarstuðulin prístalsviðgjørdur, so fingu tey lesandi 1,7 prosent minni frá Studna. Orsøkin er, at miðalprístalið nú er minus 1,7 prosent samanborið við prístalið fyri einum ári síðani.

Vanliga hækkar prístalið. Men hetta er triðja árið á rað, at prístalið lækkar. Lógarbroytingin, sum kom í tingið í gjár, fer at kosta landskassanum hálva aðru millión krónur um árið. Rúm er tó fyri tí í fíggjarlógini, sigur Rigmor Dam, landsstýriskvinna.

Tí í fíggjarlógini fyri 2016 er prístalslækkingin ikki við. Tær 700.000 krónurnar, sum landskassin kundi spart við at minka stuðulin sambært prístalinum, eru tí í fíggjarlógini.