- Tíðindi, mentan og ítróttur
Nógv fólk men einki stórmál í dagbókini á støðini
![](https://kvf.fo/sites/default/files/styles/grein-ovasta-mynd/public/politi_1.jpg?itok=GY4LRe3d)
Nógv fólk var úti í nátt, bæði í Havn og aðrastaðni, men politiið hevur eingi stórmál í journalini um náttina og morgunin.
Um fimm-tíðina kom fráboðan um, at ein maður var sligin á Toftum.
Politiið hevur tosað við mannin, sum varð sligin, og hevur navnið á tí, sum er undir illgruna fyri at hava sligið.
Koyrdi løgið
Klokkan sjey í morgun var ein bilur steðgaður í Hoyvík, tí hann koyrdi nakað løgið.
Bilførarin, ein ung kvinna, sum júst hevur fingið koyrikort, er undir illgruna fyri at koyra ávirkað.
Blóðroynd er eisini tikin av manninum, sum koyrdi út av vegnum í Kaldbaksbotni klokkan tvey í nátt.
Alt í lagi
Politiið var á skeinkistøðunum í Havn beint fyri klokkan fýra í nátt, men har var alt í lagi.
Og tað sama er at siga um skeinkistøðini í Klaksvík og í Eysturoynni, sum politiið vitjaði á midnátt.