Stevna Putin eftir endurgjaldi

Næstringar hjá teimum sum lótu lív, tá eitt flogfar varð skotið niður yvir eystara partinum av Ukraina í 2014, fara nú at stevna russiska forsetanum, Vladimir Putin, eftir endurgjaldi. Tey fara at reisa endurgjaldskravið við Europeiska mannarættindadómstólin.

Tað skrivar blaðið, Sydney Morning Herald.

Europeiski mannarættindadómstólurin hevur fingið kravið frá 33 australskum, ný sælendskum og malaysiskum familjum, og tað er eitt australskt løgfrøðingafelag sum hevur sent kravið.

Endurgjaldskravið er stórt, 48 milliónir kr. fyri hvørt av deyðu ferðafólkunum.

Í grundgevingini fyri kravinum, verður sagt, at Rusland við vilja hevur roynt at dult sín leiklut í hendingini.

Løgfrøðingurin, Jerry Skinner, sigur við blaðið, at familjurnar vilja hava, at onkur verður drigin til svars fyri hendingina. Og av tí sama er endurgjaldskravið so stórt, sigur hann.

Í fjør komu hollendskir serfrøðingar til ta niðurstøðu, at flogfarið varð rakt av eini rakett.

Í februar søgdu onnur kanningarfólk, at tey um ikki so langa tíð kunnu boða frá, hvaðani rakettin varð skotin, sum rakti flogfarið.

Familjurnar hjá øðrum av teimum deyðu, hava boðað frá, at tey ætla at stevna flogfelagnum, Malaysia Airlines eftir endurgjaldi fyri mista inntøku.

Flogfarið, MH17, varð skotið niður yvir eystara partinum av Ukraina 17. juli í 2014. Øll tey 298 fólkini sum vóru umborð, lótu lív.

Flogfarið var á veg úr Hollandi til Malaysia, tá tað varð skotið niður.