Eysturkommuna átalu fyri brot á fyrisitingarsið

Umboðsmaðurin hevur viðgjørt eina klagu um, at ein persónur ikki fekk endaligt svar uppá eina umsókn um tjaldingarøki á G! Festivalinum í 2013.

Avgerðin hjá kommununi um at nokta klagaranum loyvi til tjaldingarøki varð klagað til Innlendismálaráðið, sum í juni 2013 bað kommununa um at viðgera málið av nýggjum.

Gjørdu ikki eftir boðum

Seinni varð Kommunudeildin í Heilsu- og innlendismálaráðnum kunnað um, at kommunan ikki gjørdi eftir boðunum um nýggja viðgerð.

Umboðsmaðurin metir, at handfaringin hjá Eysturkommunu av hesum máli vera brot á góðan fyrisitingarsið og gevur kommununi eina átalu fyri málsviðgerðina.

Eisini gevur umboðsmaðurin Kommunudeildini eina átalu fyri at hava lokað málið uttan at tryggja sær, at málið er avgreitt. Avgerðin sæst á heimasíðuni hjá Løgtingsins umboðsmanni.