Halda lítið um ætlan

Donsku stjórnini dámar einki, at landsstýrið ætlar at stovna eitt váðaráð. Lógaruppskotið um føroyskt váðaráð tykist ikki vera í samsvari við myndugleikabýtið millum Danmark og Føroyar.

Tað sigur Troels Lund Poulsen, vinnumálaráðharri, í svari til Sjúrð Skaale, fólkatingsmann. Ráðharrin sigur, at samskifti er millum Danmark og Føroyar um hetta.

Løgtingið fer í dag at atkvøða um uppskotið hjá Kristinu Háfoss um váðaráðið.  Sjúrður Skaale spurdi annars ikki um váðaráðið.

SÍ EISINI Danir góðtaka ikki føroyskt váðaráð

Hann spurdi, um tað er í lagi, at landsstýrisfólkið í fíggjarmálum einki fær at vita frá danska Fíggjareftirlitinum um støðuna í føroysku peningastovnunum, fyrr enn teir eru komnir í fíggjarligar trupulleikar.

Troels Lund Poulsen sigur, at Fíggjareftirlitið hevur herda tagnarskyldu, og kann tí ikki lata frá sær upplýsingar.

Kortini kann Fíggjareftirlitið lata landsstýrisfólkinum í fíggjarmálum trúnaðarupplýsingar at brúka til kreppustýring, sigur danski ráðharrin.