Antibiotika bannast í kjøtframleiðslu

- Týdningurin av antibiotika í sjúkuviðgerð kann ikki yvirmetast, men hóttanin móti tí er ørkymlandi stór. Ein stór orsøk er, at oyðslað verður við antibiotika í altjóða kjøtframleiðslu.

Tað sigur Björn Olsen, professari í ígerðarsjúkum á lærda háskúlanum í Uppsala við svenska kringvarpið, SVT.

- Ovurnýtslan av antibiotika í kjøtframleiðsluni er eitt slag av neyðtøku av størsta undrinum innan heiligvág, sigur, Björn Olsen, professari.

Trupulleikin kann gerast altjóða

Eingi neyv samlað tøl finnast, men mett verður, at eini 60-70 prosent av øllum antibiotika, sum verður brúkt í heiminum, verður brúkt í landbúnaði og kjøtframleiðslu.

Her og nú er tað ein bíligur háttur av vaksa um framleiðsluna, men í longdini er prísurin alt ov høgur, sigur Björn Olsen, professari á lærdaháskúlanum í Uppsala.

Í einum framleiðsluumhvørvi við nógvum antibiotika, fáa vit mótstøðuførar bakteriur, og bara tær yvirliva og spjaða seg. Og í altjóðagjørda heiminum í dag, so verður lokalur trupulleiki við mótstøðuføri skjótt til altjóða trupulleika.

Krevur 700.000 lív um árið

Sambært SVT verður í dag mett, at eini 700.000 fólk doyggja árliga sum avleiðing av mótstøðuføri móti antibiotika. Verður gongdin sum higartil, verður hetta talið 10 milliónir í 2050.

Tað eru fleiri lív enn krabbamein og diabetes krevja til samans. Björn Olsen, professari, sigur, at støðan er so álvarslig, at vit eiga at seta fullkomið bann fyri antibiotika í kjøtframleiðslu og landbúnaði.

- Antibiotika er úrvalsheilivágur fyri eittans dýr í heiminum, og tað er fyri menniskjuna. Og tað skal brúkast til tey veikastu menniskjuni, tey, sum veruliga hava tørv á tí. Annars fer alt av hundanum til, sigur hann við SVT.