Fleiri enn 200 deyð eftir skriðulop

Higartil eru 206 fólk deyð í kjalarvørrinum á einum skriðulopi í býnum, Mocoa, í Kolumbia leygardagin, 200 onnur fólk eru løstað og hundraðtals onnur eru eisini saknað.

Heilir býarpartar eru skolaðir burtur eftir at áir í økinum floymdu yvir áarbakkarnar leygardagin, upplýsir Juan Manuel Santos, forseti í Kolumbia, sambært lokalum fjølmiðlum.

Talið á deyðum fer helst eisini at vaksa komandi dagarnar so hvørt sum bjargingarfólk grava seg ígjøgnum harðast raktu økini í útsynningspartinum í Kolumbia.

Greinin heldur fram niðanfyri

Colombia landslide: 'Many roads were washed away' https://t.co/L0KU3wvbWt

— BBC News (World) (@BBCWorld) April 2, 2017

Nógv regn síðstu dagarnar hevur elvt til, at tríggjar áir í økinum leygardagin floymdu yvir áarbakkarnar og elvdu til vanlukkuna. Bara leygarnáttina regnaði líka illa sum tað vanliga ger hálvan mars mánað.

Fólk í økinum vórðu ávarað um vandan fyri skriðulopi undan vanlukkuni. Tískil náddu nógv at flýggja frá húsum, og vanlukkan kundi verið enn størri, enn hon var, sigur forsetin í Kolumbia.

Tað búgva umleið 40.000 fólk í býnum, Mocoa, sum er rakt av skriðulopinum. Reyði krossur er í løtuni í gongd við at veita hjálp til fólkini í økinum, og at hjálpa til í leitiarbeiðnum.