Veiðigjaldið í Íslandi tvífaldað

Reiðarar siga, at statskassin væntar at fáa 380 milliónir krónur í okkara pengum afturat í veiðigjaldi fiskiárið 2017/2018. Og næsta ár verða væntandi 700 millónir krónur í veiðigjaldi.

Veiðigjaldið fyri tosk hækkar 107 prosent, fyri hýsu hækkar tað 127 prosent og fyri makrel 18 prosent. Tey, sum eiga fiskiskip í Íslandi, rinda veiðigjald eftir yvirskotinum hjá reiðarínum.

Veiðigjald á øllum fiskasløgum

Veiðigjaldið næsta ár byggir á tøl frá 2015. Reiðarar siga, at veiðigjaldið næsta fiskiár svarar til triðingin av avlopinum hjá íslendska fiskiflotanum í 2015.

Veiðigjaldið fyri tosk fer upp í 1,44 krónur fyri kilo, fyri hýsu fer tað upp í 1,64 kónur og fyri makrel upp í 20 oyru fyri kilo. Talan er um kilo av rundum fiski. 

Í Íslandi er veiðigjald lagt á øll fiskisløg, sum verða fiskað til matna - ella um onnur nytta fæst burturúr.