Skattalógin skal brúkast, ikki fiskivinnulógin

Tað er skeivt at brúka fiskivinnulógir til at útvega landskassanum pengar og býta virðini á annan hátt.

Tað eigur at verða gjørt við skattalógini.

Tað sigur borgarstjórin í Eysturkommunu, Jóhan Christiansen, í brævi til Vinnunevndina hjá løgtinginum.

Eysturkommuna tekur undir við, at neyðugt er at fáa eina nýskipan í fiskivinnuni.Men so skrivar Johan Christiansen, at uppskotið er í ov stóran mun merkt av umfordeiling av virðum, heldur enn at vera við til at tryggja eina góða og mennandi fiskivinnu í framtíðini.

Umfordeiling

Okkara sjónarmið er, at um løgtingið vil umfordeila ella javna millum føroyingar, ella tryggja landskassanum fleiri inntøkur, so eigur tað at vera gjørt við skattalóggávuni og ikki við einari fiskivinnulóggávu.

Við umfordeiling meinar borgarstjórin í Eysturkommunu, at uppskotið um fiskivinnunýskipan tekur frá økjunum norðanfyri, millum annað Eysturkommunu, og býtir síðani út til miðstaðarøkið og onnur øki. 

Johan Christiansen sigur, at løgtingið eigur ikki at avmarka kommunurnar uttan fyri miðstaðarøkið, nú tá inntøkurnar í uppsjóvarvinnuni eru góðar.

Vinnunevndin hjá løgtingimum hevur biðið umboð fyri býráðini í Eysturkommuna, Klaksvík, Fuglafirði, Runavík og á Tvøroyri biðin um at koma á fund við nevndina mánadagin.