Demokratur vann í konservativa statinum

Demokraturin, Doug Jones, hevur vunnið senatsvalið í amerikanska statinum Alabama.

Hann vann á republikanaranum, Roy Moore, og tað verður mett sum stórt afturstig fyri Donald Trump, forseta.

Tað er fyrstu ferð í 25 ár, at ein demokratur er valdur til senator í Alabama, sum vanliga er ein konservativur statur.

Republikanararnir varðveita kortini meirilutan í báðum tingdeildum í kongressini.

Roy Moore varð annars hildin at hava bestan kjans at vinna senatsvalið. Ætlanin var, at hann skuldi avloysa floksfelagan, Jeff Sessions, sum fyrr í ár varð tilnevndur løgmálaráðharri.

Tí varð neyðugt at hava senatsval í ótíð. 

70 ára gamli Roy Moore er ein umstríddur persónur. Tvær ferðir er hann koyrdur frá sum hægstarættardómari í Alabama, og hann er eisini lagdur undir kynsligan ágang.