Ávara um at byggja floghavnir í Grønlandi

Torben M. Andersen, sum eisini er professari í búskaparfrøði á lærda háskúlanum í Aarhus, skrivar í tíðargrein í Jyllands-Postinum, at grønlendski búskapurin verður sera viðbrekin, tí so nógvur peningur verður settur í ávísar verkætlanir.

Grønlendska landstingið hevur samtykt at flyta ein stóran part av vinningsbýtinum úr fyritøkum, sum landið eigur, í verkætlanina um at byggja floghavnir fyri meira enn tvær milliardir krónur.

Talan er m.a. um TelePost og Royal Greenland.

Á tann hátt sleppur Sjálvstýrið undan at læna meira enn 1,6 til 1,8 milliardir krónur til floghavnirnar.

- Men hetta ger grønlendska búskapin sera viðbreknan, sigur Toben M. Andersen, sum mælir frá hesum fíggingarleistinum.

Haraftrat er ógreitt, hvussu raksturin skal fíggjast, sigur hann.

Formaðurin í grønlendska búskaparráðnum vísir eisini á, at ongar greiningar eru gjørdar av hesi stóru verkætlanini.

Sambært grønlendsku sjálvstýrislógini ber ikki til at hækka heildarveitingina úr Danmark, kemur Grønland í búskaparligar trupulleikar, sigur Torben M. Andersen í tíðargreinini í Jyllands-Postinum. 

Arbeiðið at byggja floghavnirnar verður eftir ætlan boðið út í 2018.