Fimta vikan við arbeiðsstegðinum, eingin glotti

Nú er fimta vikan byrjað við sáttmálatrætuni millum Pedagogfelagið og Lønardeildina hjá Fíggjarmálaráðnum og Kommunala arbeiðsgevarafelagið.

Verkfallið og verkbannið halda fram, og tað stendur framvegis í botni í samráðingunum.

Við Útvarpið leygarkvøldið segði semingsmaðurin, Terje Sigurðsson, seg framvegis bíða eftir, at arbeiðsgevararnir og Pedagogfelagið flyta seg so mikið, at tey kunnu seta seg aftur við samráðingarborðið.

Síðani tá er einki broytt.

Byrjaði 12.desember

Verkfallið hjá pedagogunum byrjaði 12.desember. Tá fóru leiðarar, varaleiðarar og dagrøktarleiðarar í verkfall.

Síðani lýsti Kommunala arbeiðsgevarafelagið verkbann og 14.desember stongdu allir dagstovnar, vøggustovur og barnagarðar.

Seinni varð verkfallið víðkað til eisini at umfata bústovnar undir Almannaverkinum, tó við teimum undantøkum, sum Almannanverkið og Pedagogfelagið hava verið samd um.

Og mikudagin í síðstu varð verkfallið aftur hert. 

Tá fóru limir í Pedagogfelagnum, sum starvast í fólkaskúlanum, í sernámi og í forskúlum hjá kommununum, til hús.